30.6.05

Viðbótarupplýsingar

Þeir tóku víst burt tvo hryggjartinda sem voru eitthvað afvegaleiddir þarna í hryggnum.

Von á kalli heim um miðjan dag.

Manninum halda engin bönd

Örn er svo hress og sprækur eftir aðgerðina að hann fær að fara heim seinna í dag þegar hann hefur hitt her sérfræðinga í hinum ýmsu málum.

Læknirinn sagði honum í morgun að aðgerðin hafi heppnast eins og best verður á kosið þeir hafi tekið nokkra liðþófa sem hafi verið gengnir inn og skafið burt beinvef innanúr mænugöngunum, þá hafi rennslið á mænuvökvanum verið orðið fínt.

Hann er óðum að losna við slöngur og þá halda honum engin bönd.

Þannig að það þýðir víst lítið að heimsækja hann á sjúkrahúsið en hann verður allavega heima í nokkra daga. Vonandi.

29.6.05

Glænýjar fréttir af Erni

Var að koma frá Erni sem var að koma niður af vöknun fyrir hálftíma eða svo. Hann er hinn hressasti og vill helst bara strax fara heim en er haminn með fullt af slöngum hér og þar. Þegar ég stoppaði aðeins við kom hjúkkan með enn eina slönguna og skellti honum í súrefni til að hemja kallinn. Hann hefði nú frekar þegið smók en.........

Það lá sem sagt vel á karli kannski var hann bara uppdópaður!!!

Af aðgerðinni er það að frétta í bili að hún tókst víst mjög vel þeir skófu úr mænugöngunum beinbólguvefinn og eitthvað fleira, tóka líka risastórt brjósklos í burtu.

Árangurinn kemur svo í ljós fáum líka nánari fréttir á morgun hjá læknunum.

Hann liggur sem sagt á Borgarspítalanum B5 stofu 210 ef þið eruð á ferðinni næstu daga.

Nýjustu fréttir og meiri myndir

Nýjustu fréttir er að Örn er kominn af skurðarborðinu og líður ágætlega á vöknun. Ekki hef ég enn fengið fréttir af aðgerðinni en það kemur.

Hér er slóð á myndir af Ísak Orra og Almari Leó sem ég tók í stuttu innliti til þeirra á Akureyri.

Jói og Guðný til hamingju með nýja húsið

Myndir

Jæja meðan ég bíð eftir fréttum af spítalanum er ég búin að dunda mér við að setja inn myndir úr norðurferðinni.

Þá sá ég að ég hafði alveg gleymt að segja frá því að Labbi vann það afrek að fara niður kirkjutröppurnar 108 á Akureyri.

Slóðin á myndaalbúmið er hér

28.6.05

Nýjustu fréttir

Örn er loksins kominn á spítalann. Fer í aðgerð í fyrramálið verður annar í röðinn. Hann er ansi kvíðinn fyrir þessu en vonar það besta. Set fréttir inn þegar einhverjar eru. Það verður bæklunarteymi og taugateymi sem ætlar að opna hrygginn neðst og reyna að skafa innan úr mænugöngunum og kannski eitthvað fleira eftir hvað kemur í ljós þegar þeir opna. Vonandi fær hann meir mátt í fæturnar og verður verkjalaus á eftir.

Vertu nú yfir og allt um kring
með eilífri blessun þinni
Sitji guðs englar saman í hring
sænginni yfir minni


Þessi bæn er mér alltaf ofarlega í huga á svona stundum og eins og ég hef áður fjallað um hér á blogginu. Nú sendi ég alla englana mína yfir hann og þá fer vonandi allt vel.

Leikum saman (löng saga)

Loksins er að renna af mér mesta þreytan og ætla ég nú að reyna að gera ferðasögunni skil. Við lögðum af stað norður á þriðjudag og þar sem við erum gömul og lúin þá vorum við okkar klassísku 6 tíma á leiðinni enda nutum við náttúrunnar þó við söknuðum prinsessunnar okkar sem venjulega hefur fengið að vera með okkur á ferðalögum. Á Eddunni fengum við þetta líka fína herbergi hjólastólafært og frábært. Reyndar komst Örn ekki niður í matsalinn en okkur var þá bara færður morgunverður upp á setustofu.

Við fórum svo að heimsækja Jóa og Guðný í nýja húsið. Fallegt hús og heimili til hamingju krakkar. Strákarnir þeirra hver öðrum fallegri og yndislegri. Sá yngri ansi mikill vargur, hressilegir strákar.

Þegar leið á kvöldið týndust Halarnir norður og skellt var í smá gleðskap. En við vorum 6 frá Halaleikhópnum, reyndar bættist 1 Hali svo við einn daginn.

Opnunarhátíðin var svo á miðvikudeginum og skemmst frá því að segja að hún var algerlega misheppnuð eða réttara sagt vitlaust kynnt þannig að flestir ef ekki allir misstu af henni, en fall er fararheill. Setningin tókst svo vel með sirkusatriðum og gamni þó bæði forsetinn og bæjarstjórinn væru veikir þá tókst þetta mjög vel á Ráðhústorginu.

Fyrsta sýningin var svo kl. 16.00 í Samkomuhúsinu þar sem Leikhópurinn Jonava frá Litháen sýndi Bobos eða Konur. Kröftugur leikhópur sem tókst að skemmta manni og hrífa þó maður skildi ekki eitt einasta orð. Þau voru snillingar í andlitsgrettum búningar mjög skemmtilegir og umgjörðin einföld og falleg. Eftir á þegar maður sá svo leikarana í öðru ljósi þekkti maður þá alls ekki alla aftur gervin voru það góð.

Næst fór ég á Dýragarðssögu kl. 17.30 með Leikfélagi Hafnarfjarðar í Húsinu. Þar komst Örn ekki með þar sem það hús er algerlega óaðgengilegt og hann vill ekki láta bera sig upp og niður stiga, sem ég skil svo sem vel ekki myndi ég vilja láta bera mig. En þetta var eina húsið sem var alveg óaðgengilegt.

En að sýningunni Hafnfirðingarnir Gunnar Björn og Guðmundur Lúðvík sýndu afbragðsleik undir leikstjórn Halldórs Magnússonar, enda fékk Gunnar verðlaun fyrir besta leik í karlhlutverki fyrir það verk. Leikmyndin var einföld og algerlega brilljant. Lýsing og búningar til fyrirmyndar. Maður kom sæll út af þessum sýningum.

Hafnfirðingarnir voru ansi skemmtilegir þeir voru allan tímann í gamaldags jakkafötum með bindi og sólgleraugu allt í stíl og skiptu oft voru greinilega með gott búningasafn með sér og settu skemmtilegan svip á hátíðina.

Þá stungu Halarnir sér á Greifann að borða saman til að safna orku fyrir kvöldið. Góður hópur í fínu stuði.

Um kvöldið forum við svo í Ketilshús að sjá Hugleik með Patataz. Það var líka frábært leikrit og vel leikið sviðsmyndin mjög vel unnin og mikið í hana lagt sem og búninga. Leikurinn líka mjög góður þar sem Sigurður H. Pálsson fór á kostum og talaði með arabískum hreim sem hélt alla sýninguna alger snilld. Maður kom alveg heillaður út og spáði í hvernig væri nú hægt að toppa þennan dag því gæði þessa sýninga voru mjög há. Algert konfekt fyrir öll skynfæri.

Ketilshús var alveg aðgengilegt en því miður höfðu áhorfendapallar verið settir fyrir gangveginn inn í salinn þannig að við þurftum að fara smá krókaleið en ekkert mál.

Ekki vorum við nú tilbúin að fara að sofa eftir þetta svo við fjögur sem héldum mest saman við hjónakornin og Stebba og Labbi, skelltum okkur á Græna hattinn (tvær tröppur) á hátíðarklúbbinn þar var mjög gaman. Leikfélagið Sýnir stóð þar fyrir leikhússporti og var mikið fjör. Það voru svo lúnir Halar sem skriðu heim fyrir tvö.

Á fimmtudeginum tókum við það rólega fram að hádegi skelltum okkur á gagnrýnifund kl. 13.00 þar sem Þráinn Karlsson leikari og Þorsteinn Bachmann leikari og fyrrum leikhússtjóri gagnrýndu sýningar dagsins á undan auk eins gestagagnrýnanda. Það var ansi fróðlegt að heyra hvað þeim fannst og skemmtilegt. Mér fannst ég geta lært ýmislegt á að hlusta.

Kl. 15.00 var svo skundað í Freyvang að sjá Taktu lagið Lóa með Freyvangsleikhúsinu. Það var búið að segja okkur að þar væri skábraut inn en hún var horfin eitthvað svo enn fórum við inn bakdyramegin. Nóg af sterkum strákum í Eyjafirði.

Guðrún Halla formaður BÍL lék aðalhlutverkið og gervið var svo gott að lengi vel þekkti ég hana ekki. Sýningin var alveg ágæt þó ekki toppaði hún nú sýningar dagsins á undan enda erfitt. María Gunnarsdóttir sýndi þó frábæran leik og söng svo fallega að það fór gæsahúð um mann. Skipti um persónur í söngnum algerlega átakalaust. Söngur hennar þennan dag inni í Freyvangi þegar það var glampandi sól og blíða úti rennur seint úr minni. Það var einnig mjög vel útfærð tæknibrella þegar kviknaði í sviðsmyndinni.

Kl. 18.00 var svo komið að Svíunum Cirkity Gravikus í Ketilhúsi með 40% af engu. Ég varð satt að segja fyrir vonbrigðum með þá sýningu og fannst gæði hennar ekki vera til þess að fara með milli landa. En ég skemmti mér þó ágætlega og ýmis atriði voru vel gerð en sem heild ekki alveg að gera sig. Kannski er hluti skýringarinnar að við eigum svo fínan Sirkushóp á Akureyri Cirkus Atlanta sem ég er búinn að sjá nokkrum sinnum og þeir eru svo frábærir að Svíarnir falla í skuggann kannski hefðu þeir matt bæta 60% við til að virka.

Við vorum orðin þreytt eftir þetta og skelltum okkur í mat á Bautann þar hittum við s´öunda Halann hann Kidda 1 sem var kominn til að troða upp í hátíðarklúbbnum um kvöldið.

Það var Jónsmessuhátíð í Kjarnaskógi sem við treystum okkur ekki alveg á sökum aðgengis og þreytu. Slöppuðum bara á fram eftir kvöldi og skelltum okkur svo í Deigluna um kvöldið þar var aðgengi í lagi það er að segja þegar við komumst upp Gilið. En ekki hjólastólafært á WC. Þar voru nokkur skemmtiatriði söngur og gaman. Við misstum af Kidda hann var búinn með sitt atriði þegar við komum en það kom ekki að sök þar sem við höfðum öll séð það sum nokkrum sinnum.

Á föstudagsmorguninn skelltum við okkur svo í leiksmiðju hjá Stefáni Vilhelmssyni sem var með STOMP það var mjög gaman, hann var búinn að tína ýmislegt járnarusl af öskuhaugunum var með tvær bassatrommur og við fengum svo niðursöguð kústsköft með teypaða enda í hendurnar og svo var bara byrjað að berja allt sem fyrir fannst og leitað að hljóðum og takti. Við fengum hressilega útrás. Þá var haldið Stompandi niður Listagilið og út alla göngugötuna og allt barið sem gat gefið frá sér skemmtilegt hljóð. Fundum tvo gáma sem gáfu ansi skemmtilegt sound. Þeir sem mig þekkja vita að ég hef ekki mikinn tón eða takt í mér en allavega skemmti ég mér mjög vel og hélt út til hádegis meira en ég reiknaði með.

Kl. 13.00 fórum við Stebba svo á gagnrýnifund aftur og var það fróðlegt og skemmtilegt.

Kl. 15.00 fórum við öll nema Örn í Ketilshús að sjá Memento Mori hjá Hugleik og Leikfélagi Kópavogs. Örn ákvað að hvíla sig þar sem við vorum búin að sjá sýninguna í vetur. Í stuttu máli sagt var sýningin frábær í alla staði og ekki versnað frá í vetur. Vel skrifað stykki, frábær leikur, frábær hreyfimunstur, umgerðin einföld og falleg, búningarnir hreint unaðslegir. Takk fyrir sýninguna. Þess má geta að hún var svo í lok hátíðar valin besta sýning hátíðarinnar. Enda átti hún það fyllilega skilið þó margar aðrar hafi komið sterklega til greina og keppnin hörð. Huld Óskarsdóttir átti brilljant leik maður grét og hló með henni fékk fiðring um allan kroppinn. Takk Huld.

Kl. 19.00 var svo skundað enn í leikhús nú á Davíð Oddson Superstar með Leikklúbbnum Sögu í Útihúsinu þar hafði okkur verið sagt að þetta væri í skemmu en þar væri beint inn. Skemma var það en hár var þröskuldurinn vægast sagt. En aftur fékk Örn flugferð. Þetta voru ungir kraftmiklir krakkar sem stóðu sig ágætlega allavega hreifst ég með þeim af leikgleði þeirra og sköpunarkrafti. Þau eiga örugglega eftir að þroskast í fína skapandi leikara.

Eftir stutt matarhlé var svo brunað fram í Hörgárdal að Melum þar sem Leikfélag Hörgdæla sýndi Stundarfrið. Aðgengi þar var gott hjólastólaklósett og alles en trappa af planinu upp á stéttina. Melar er yndislegt félagsheimili og notaleg stemming í húsinu, skemmtilegt fannst mér að þar serveruðu miðaldra karlmenn kaffi og þjónuðu gestum. Hlutverk sem allt of oft lendir á kellum.

Jæja en Stundarfriður var prýðilegt verk vel leikið og sviðmyndin mjög fín. Búið var að færa verkið fram í tíma og tókst það vel. Eftirminnilegur var leikur Vigdísar Maríu Hermannsdóttur sem sýndi snilldartakta og hvíldi einstaklega vel í hlutverki sínu þó er hún bara 14 ára. Ég skemmti mér vel það kvöld og kom sæl úr sveitinni.
Þetta kvöld eða nótt var farið snemma að sofa og hátíðarklúbbnum sleppt.

Nú upp rann laugardagur og Stebba átti afmæli og fékk að sofa út. Ég skellti mér á fyrirlestur hjá Bernd Ogrodnik í leikbrúðugerð. Þar var á ferð alger snillingur sem heillaði mig upp úr skónum. Hann sýndi hinar ýmsu gerðir af brúðum allt frá tveimur augum upp í margslungnar strengjabrúður sem notaðar voru í String myndinni.

Hann talaði líka um það hvernig leikarinn þarf að hugsa um sjálfan sig ef hann er ekki í formi þegar hann er að leika þá gerist ekkert og hann er ekki viðbúinn ef eitthvað fer úrskeiðis. Talaði mikið um mikilvægi einbeitingar og innstillingar og að fara vel með sig. Alger snillingur á ferð og einstakur maður.

Kl. 13.00 fór ég svo á gagnrýnifundinn alltaf jafn fróðlegt.

Svo skellti maður sér kl. 14.00 á Birdy hjá Leikfélagi Hafnarfjarðar í Húsinu. Frábær sýning og vel gerð í alla staði, frábær leikur er Stefán Benedikt Vilhjálmsson einstaklega eftirminnilegur. Verkið var leikið í talsverðri nánd ég var á fremsta bekk. Skiptingar voru skemmtilegar, leikmyndin góð og allt eins og best var á kosið. Enn eitt snilldarverkið sem maður naut á hátíðinni.

Kl. 16.00 fórum við svo í Ketilhús og sáum Allra kvikinda líki hjá Leikfélagi Kópavogs. Það var vel útfærðar senur úr teiknimyndasögum og skemmti ég mér mjög vel. Sýningin kitlaði hláturstaugarnar hressilega og leikurinn góður þó samt nokkuð misjafn milli leikara. Bjarni töframaður fór á kostum og er eftirminnilegur sem og Andrea Ösp Karlsdóttir. Það er gaman að fylgjast með hvernig þessi leikhópur þróar teiknimyndaformið.

Þá var skundað upp á hótel og sett upp spariandlitið því nú var lokahófið í aðsigi. Reyndar skyggði það á gleðina að hófið var haldið í Freyvangi og þar kemst Örn ekki á klósett. En við létum það ekkert á okkur fá og mættum í okkar fínasta pússi með góða skapið í hjartanu. Okkar mætti fyndin sjón þegar við komum, fjórir fílefldir karlmenn voru að koma einhverstaðar utan af túni með þessa líka risa skábraut sem var skellt á tröppurnar, frekar óstöðug en virkaði.

Hátíðarnefnin mallaði ofaní okkur 200 manns glerfínan mat af mikilli snilld. Júlíus Júlíusson frá leikfélagi Dalvíkur stjórnaði veislunni með miklum glæsibrag. Fjöldinn allur af skemmtiatriðum var enda fullt hús af leikurum. Skemmtilegast var samt að nöfn allra leikritanna var sett í umslag sem hver leikhópur dró svo og þurfti að leika það leikrit sem það dró á 2 mínútum og hafði tvær mín í undirbúning og svo átti salurinn að giska hvaða verk það væri. Öllum tókst vel upp meira að segja Litháanir sem ekki skildu íslensku og varla ensku heldur. Síðan var leikið fyrir dansi.

Afmælissöngurinn var sunginn fyrir elsku Stebbu sem var 33 ára þetta kvöld. Örn fór svo heim þegar kom að klósett ferð ásamt Jónda og Siggu en við villingarnir héldum út meðan ballið entist og svo var auðvita partý uppá hóteli.

Það var svo frekar framlágt lið sem mætti í Samkomuhúsið á Náttúran kallar hjá Leikfélagi Selfoss kl. 13.00 á sunnudeginum. Verkið þeirra fannst mér síst af því sem ég sá kannski var það mitt ástand en samt skemmti ég mér bærilega á köflum. Sviðslausnirnar voru mjög fínar hjá þeim en leikurinn misjafn og verkið klént.

Á eftir var svo gagnrýnifundur og verðlaunaafhending. Ég var mjög sátt við hvernig þau deildust niður en úr vöndu var að ráða. Enda eins og fram hefur komið hvert verkið öðru betra og standardinn ansi hár á þessari annarri leiklistarhátíð BÍL.

Það er óhætt að segja að þetta hafi verið unaðslegir dagar en strembnir enda þreytt fólk og sælt sem rann suður fyrir heiðar. Mæli hiklaust með að allir sem hafi á annað borð áhuga á leiklist láti svona hátíðir ekki fara fram hjá sér.

Myndir úr ferðinni eru svo hér.

Nánari umfjöllun er svo á BÍL www.leiklist.is

27.6.05

Er enn á lífi

Bara að láta vita að ég er enn á lífi. Bara örþreytt eftir velheppnaða ferð á leiklistarhátíðina Leikum saman á Akureyri. Sjá myndir hér

Geri ferðinni skil þegar mesta þreytan rennur af mér ;-) En það var mjög gaman og allt vel heppnað.

Örn fer á spítalann á morgun í rannsóknir og verður svo skorinn á miðvikudaginn. Set inn fréttir um það jafnóðum.

Smala bara englunum minum saman yfir hann og allt fer vel.

17.6.05

Menningarvitarnir á Sléttuveginum

Gærdagurinn fór að mestu í menningarupplifanir af hinum ýmsu sortum.

Fyrst brugðum við okkur á hádegistónleika hjá SJER á báti sem er húshljómsveit Sjálfsbjargarhússins. Þeir voru á stóru svölunum og var vel mætt enda einmuna veðurblíða. Strákarnir Siggi, Jóndi, Einar og Ragnar stóðu sig mjög vel og var unun að sitja þarna í góðra vina hóp og hlusta í sólinni.

Kl 3 var okkur svo boðið á uppskeruhátíð hjá Fjörkálfunum í Miðbergi sem voru að ljúka leiklistarnámskeiði. En Hekla prinsessan okkar er í þeim hóp. Þau settu upp leikritið EINMANA GRASFLÖTIN við góðar undirtektir. Þetta tókst allt vel hjá þeim og stóðu sig eins og þrautæfðir leikarar. Þau sömdu leikritið, æfðu hlutverkin, bjuggu til sviðsmynd, sköpuðu hljóðmynd og saumuðu alla búninga á 4 dögum geri aðrir betur.



Hér má sjá Heklu í hlutverki Álfadísar og í leikfimiæfingum sem var partur í skemmtiatriðum sem voru í afmæli einmana grasflatarinnar.




Þess má geta að Hekla á ekki orð yfir það að Halaleikhópurinn skuli vera svona seinn að setja upp leikrit marga mánuði í æfingar og undirbúning meðan þau gerðu þetta á 4 dögum.

Um kvöldið var svo meiri menning og horft á hina Íslensku Grímuhátíð og hafði ég bara gaman af. Svo var skellt í spilamennsku fram á rauðanótt.

15.6.05

Halaveiði

Eins og svo oft þessa dagana lá leiðin upp í Krika við Elliðavatn í dag, hér er mynd af sælureitnum ef þið hafið ekki enn ratað á paradísina
Á leiðinn skruppum við í Hafnarfjörð og tókum einn Hala með okkur þennan sem er nýkominn frá USA upp í Krika var svo enn einn Hali þessi sem nefnist eftir sólinni.

Jæja en þar sem koma saman nokkrir Halar gerist alltaf eitthvað skemmtileg.

Þar sem Hali K3 (ekki kafbáturinn þó hann ætti nú eftir að sýna þá tilburði þann daginn) hafði ekki komið áður í Krikann fór hann að kíkja í kringum sig og rakst þá á Veiðistangir ofl. Ákvað að prófa græjurnar og settir fyrstu stönginni í vatnið og vitir menn eins og við vorum búin að segja honum er ALLTAF rífandi veiði af bryggjunni okkar fínu, hann krækti í einn í fyrsta kasti. Ræðum ekki stærðina hér en Silungur var það.

Nú bættust við fullur bíll af Hölum og svo enn annar bíll af Hölum og þar sem Hali K3 er nú eins og hann er þá fór hann að athuga allar græjurnar og skrúfa sundur og saman hin ýmsu hjól og stangir við mikla athygli Halahópsins alls. Fór svo að veiða á Grillið svo nú væri hægt að halda almennilegt Halageim.


Ákafinn var svo mikill við að ná þeim stóra að hann óð út í vatnið við mikinn taugakjálfta frá Halaakademíunni. Allir stóðu á öndinni og tilþrifin voru eftir því. Ég hljóp náttúrulega með myndavélina til að ná löndun þess stóra á mynd eða falli K3 í vatnið en hvorugt tókst.



Í stuttu máli sagt frábær dagur í góðu veðri en kvöldmaturinn var snæddur annarstaðar

11.6.05

Fann þetta ljóð á ljod.is og vildi deila því með ykkur

Heilindi

orð þín
í tíma töluð

þínum tíma

tilveran er fléttuð úr óendanlegum fjölda smáatriða
hugsunum
orðum og athöfnum
sem mynda saman fínofinn
ósýnilegan vef
sem er líf okkar

vefinn getum við einungis séð
með því að stíga
út úr okkur sjálfum

út úr vefnum

og píra “augun” á ákveðinn hátt

ef vefurinn er heill
er allt í lagi

orð mín
í tíma töluð

mínum tíma

er vefur okkar heill?




Sölvi Fannar

8.6.05

Tvær líkamsárásir sama daginn er nú too much!!!

Það hefur verið algert stríðsástand á mínu heimili í dag!!!

Tvisvar hef ég orðið fyrir líkamsárás á mínu eigin heimili sama daginn.

Fyrr í dag var ég að sinna heimilisverkum eins og sannri húsmóður sæmir, kemur þá ekki æðandi í fangið á mér meters hár loðinn kaktus #%&$&"#=#"#$=). Hvað gerir maður ekki grípur kvikindið og það stingur mann allan. Ég æpti auðvitað hvað gat ég annað Örn kom rúllandi og sagði hann stingur ekki þessi það eru ekki nálar í honum, tjaran sem getur ollið út úr þessum köllum. Ég var svo lengi að losa ferlíkið úr höndunum á mér og hef verið fram eftir kvöldi að tína nálar úr höndunum á mér hér og þar.

Kaktusinn hafði verið í einhverri sjúkrameðferð hjá Erni í eldhúsinu út í horni mátti ekki vera í dagsbirtu...........

Ég var alveg brjáluð en Örn að springa úr kæti því í öllum látunum sá hann að það var kominn blómknúbbur út úr hliðinni á ferlíkinu.

Undarlegt áhugamál sem minn elskanlegur hefur. Nú þarf ég að finna aðferð við að koma þessum metersháa skelfilega kaktus aftur í blómapott sem heldur honum þegar hann vill steypa sér ofan í uppþvottavélina. Ef einhverjir sjálfboðaliðar eru til í þetta stórverkefni þá eru þeir vel þegnir. Því þegar ég fór svo að ná mér og að tala við kallinn aftur þá fór hann að tala um að það þyrfti að fara að skipta á fleiri kaktusum!!!!!!!!!!!!!

Eins og þeir vita sem hafa komið í heimsókn erum við með ansi stórann stofuglugga og hann er stútfullur af kaktusum af ýmsum stærðum flestum með hrikalegum nálum.

Þegar ég sagðist taka við húsmóðurstarfinu þá var ég nú ekki með þessa deild í huga. En vonandi spretta hér inn næstu daga sjálfboðaliðar í hrönnum. Nú reynir á kæru vinir og fjölskylda.

Jæja en það var ekki allt búið í kvöld var ég að spjalla í símann og labbaði að glugganum þegar einn kaktusinn þessi með stærstu nálunum stökk og stakk mig í bumbuna og mér fannst það nú ekki fyndið þá en núna ;-))))

Það er sem sagt aðeins búið að breyta og skapa meira pláss við gluggann fyrir hjólastólinn og við það komu í ljós ýmsar hættur.

7.6.05

Snæfellsnes er málið

Enn annir á þessum bæ ég sem hélt það væri komið sumar ;-)

Á laugardaginn fór ég ásamt fleirum á Grundarfjörð til að halda kynningarfund um Sjálfsbjörg. Við fengum besta veður sem hægt er að hugsa sér til svona ferðalaga (en ekki fundarhalda).

Það var sól og blíða og útsýnið alveg eins og það getur best verið. Þvílík forréttindi að búa í svona fallegu og lítt menguðu landi. Fjöllin, sjórinn og landslagið allt var frábært og skartaði sínum fegurstu litum.

Mér hefur alltaf gefist vel að sækja kraftinn í náttúruna og þarna fékk ég góða áfyllingu á tankana sem voru ansi tómir eftir margra mánaða annir.

Litirnir á Snæfellsnesi eru engu líkir og hvet ég alla til að skreppa í bíltúr kringum nesið í næsta bjarta veðri. Vegirnir eru orðnir svo fínir og göngin stytta leiðina ansi mikið.

Annars er ég meira og minna með nefið ofan í tölvunni ennþá farin að skilja betur námskeiðið og allt að smella saman.

Þess á milli hef ég verið að hagræða ýmsu betur hér heima til að hjólastóllinn renni betur á alla staði. Ýmsar tilfæringar nema inn á einkaskrifstofunni þar er allt í drasli og ætla ég bara að leifa því að vera svo aðeins lengur.

Svo er verið að telja niður í Akureyraferðina 14 dagar í leikum saman hátíðina ;-)

Engar fréttir að símamálum :-(