Vonlausar væntingar

Finnst einhvern veginn að ég eigi núna að skrifa eitthvað gáfulegt hér

En það bara kemur ekki

Stundum er maður bara ekki í stuði

en það er gott veður úti og inni

Hugsa ég fari bara að lesa Ísfólkið nenni ekki í Bónus

Nenni ekki í póstkassann að ná í blöðin og kl er orðin 14.05

Er samt löngu vöknuð

Látum þetta duga í dag

Ekki gleyma fundinum í kvöld

Kosning á þing Sjálfsbjargar

Á fundinum verða kosnir fulltrúar Sjálfsbjargar á höfuðborgarsvæðinu til setu á þingi Sjálfsbjargar, lsf. sem verður haldið 19. - 21. maí 2006. Fundurinn hefst kl. 19:30 þriðjudaginn 28. mars í félagsheimilinu Hátúni 12.

Mætum nú öll og styðjum okkar fólk :-)

Bland í poka

Afslöppunin er alveg að takast. Tókst að sofa til hádegis tvo daga í röð um helgina og vera á náttfötunum til 2 svo það er mikil framför fyrir morgunhanann minn.

Tvær sýningar voru um helgina og gengu þær bara nokkuð vel, ég er stolt af Hölunum mínum eftir helgina. Allir lögðust á eitt að gera sitt besta og útkoman var góð. Enn er hægt að fá miða allar upplýsingar á www.halaleikhopurinn.is. Í dag er svo alþjóðlegi leiklistardagurinn sjá nánar hér

Sorgaratburður varð á heimilinu á laugardaginn ég fór að vera dugleg og skipti um peru í fína lampanum frá Ömmu Villu erfðagóssinu mikla. Fannst skermurinn eitthvað rykugur og fór með hann út á svalir í sólina til að dusta hann aðeins. En greyið var orðinn svo fúinn að þegar ég rétt snerti hann lauslega hrökk efnið í sundur :-( Það var mikil sorg. Amma mín saumaði þennan skerm þegar ég var barn og mér hefur alltaf fundist hann sá flottasti í heimi. Nú eru góð ráð dýr. Þó mér sé ýmislegt til lista lagt og hafi saumað nokkra lampaskermi á minni löngu æfi legg ég ekki í svona meistaraverk. Svo nú auglýsi ég eftir flinkum skermagerðaraðila. Ég græt innra með mér enn yfir skerminum merkilegt hvað maður getur tengst dauðum hlutum sem jú hafa sál.



Ég varð fyrir merkilegri lífsreynslu í vikunni var að fara í verslun og á planinu fyrir utan hitti ég mann sem ég þekki ekki neitt en les reglulega bloggið hans þar sem hann er frábær penni. Fannst þetta ferlega hallærislegt fór eiginlega í flækju en strunsaði bara fram hjá uppáhaldsbloggaranum mínum eins og ég vissi ekkert hver þetta væri. Hefði kannski átt að biðja hann um eiginhandaráritun á USB-tengið mitt :-) Já netheimar eru merkilegir maður fer að fylgjast með hinum ýmsu málum sem manni koma kannski ekkert við. En allt eru þetta opnar síður. Hvað á maður að gera í svona málum? Nú væri gott að fá komment.... Á maður kannski ekki að lesa blogg frá fólki sem maður þekkir ekki? Eða þarf maður að biðja um leyfi? Hvað finnst ykkur?

Ein ráðvillt en af gefnu tilefni er þessi bloggsíða opin almenningi en gaman væri að vita hvort einhver les bullið í mér

Leiklistarbakterían tekur öll völd

Já það er óhætt að segja að maður sé aðeins að hressast af síþreytunni en önnur veira hefur aftur á móti tekið völdin heldur skemmtilegri finnst mér alla vega.

Í dag skellti ég mér á opinn samlestur í Borgarleikhúsinu á Viltu finna milljón. Það var gaman að sjá hvernig atvinnumennirnir og landslið leikara gerir þetta. Merkilegt fannst mér að sjá hversu lítill munur er á vinnubrögðum er hjá þeim og okkur í okkar litla sæta leikhúsi Halanum. Aðeins fleiri í kringum leikarana en annars bara eins og hjá okkur.

Viltu finna milljón, eftir Ray Cooney, er farsi af betri gerðinni með óteljandi hurðaskellum, misskilningi, lygi, ástarmálum, morði ofl. sem gerir verkið afar spennandi og hlægilegt. Spái að þetta sé verk sem mun verða til þess að ýmsir fá magakrampa og bakföll af hlátri.

Svo er ég búin að bóka mig í leikhús með vinum á fimmtudaginn á WOYZECK hlakka mikið til. Æfing hjá okkur á miðvikudaginn og svo tvær sýningar um helgina. Já það er óhætt að segja að það kemst lítið annað að en leiklist og meiri leiklist þessa dagana.


Næstu sýningar á Pókók eru á föstudagskvöldið kl. 20.00 og sunnudagskvöldið kl. 20.00. Nánari upplýsingar eru á heimasíðu Halaleikhópsins

Enn á lífi

Sorry hvað ég er löt að blogga þessa vikuna. Held bara ég hafi alveg klárað orkuna síðustu vikurnar. Síþreytan hefur tekið öll völd og daglegir hlutir eru orðnir erfiðir. En þetta er ástand sem ég þekki vel og þarf bara að gefa sinn tíma. Svo rís ég aftur upp fílefld vonandi innan skamms. Hafið bara þolinmæði með mér á meðan.

Frumsýningin gekk mjög vel þrátt fyrir að tvo leikara vantaði vegna veikinda, smá breyting og íhlaupaleikari af bestu sort redduðu málunum. Um frumsýningarpartýið ætla ég að hafa sem fæst orð enda er skrifað um það á hinum ýmsu stöðum á netinu. En ég alla vega skemmti mér vel.

Húsbóndinn er á hægum batavegi og ætlar að leika á morgun. Miðasala og allar upplýsingar eru á www.halaleikhopurinn.is nú er tækifærið til að drífa sig í leikhús og skemmta sér vel.

Allt er þegar þrennt er

Já ég vona að það sé mikill sannleikur fólginn í þessu orðatiltæki. Allavega eru þrír meðlimir Pókóksliðsins núna fjarverandi vegna alvarlegra veikinda. Fyrst veiktist ein leikkonan og mun ekki geta verið með okkur næstu mánuðina, svo fótbrotnaði miðasölustúlkan og í dag fékk minn heittelskaði eiginmaður og leikari bráðasýkingu og mun ekki geta verið með næstu daga alla vega.

Og generalprufa í kvöld og frumsýning á MORGUN !!!

Já ég varð svolítið trekt verð að viðurkenna það. Milljón hugsanir þjóta gegnum hugann og ekkert stopp á flæðinu í heilabúinu, vantar allar umferðarstjórnum á þann bæ.

En það kemur alltaf maður í manns stað og sem betur fer hefur Halinn á að skipa miklu af úrvalsfólki sem leysir vandamálin en dettur ekki um þröskuldana. Einn gamall og reyndur leikari datt inn í dag og Villi leikstjóri greip hann á staðnum. Já Jóndi ætlar að leysa Ödda minn af og gerir það eflaust vel.

Töfrarnir eru að skapast í leikhúsinu enn eru hvöss horn hér og þar en þetta verður örugglega fínslípað á laugardagskvöldið enda mikið af úrvalsleikurum með okkur þetta árið eins og ævinlega. Ég hef alla vega tröllartrú á mannskapnum held að hann geti vel unnið saman sem ein heild. Hlakka til frumsýningarinnar.

En tröllatrú mín á heilbrigðiskerfinu er ekki eins mikil. Þegar kom í ljós að við þyrftum að láta athuga fótinn á kalli hringdi ég upp á slysó til að athuga hvert ég ætti að fara með hann, jú jú komdu en það er 2 tíma bið og ekki hægt að skrá sig í röðina gegnum síma þó maður væri staddur í næsta húsi.

Og það varð raunin eftir innskráningu sagðist stúlkan hleypa honum framfyrir þar sem ástandið á honum var svona slæmt. En við biðum samt í tvo tíma á biðstofunni og svo inni líka langa stund áður en doksi kom. Jú jú bráðasýking þarf að fara í ræktun og fá sýklalyf í æð á 8 tíma fresti í einhvern tíma. Þurfi að vera með lyf í poka að leka inn í klukkutíma.

Svo kom rúsínan í pylsuendanum. Það er ekkert pláss á spítalanum fyrir hann allt fullt og enga heimahjúkrun að fá það er svo mikið að gera hjá þeim. Nei nei hann fárveikur maðurinn þarf að koma á 8 tíma fresti á spítalann til að fá lyf í æð og fara heim á milli. Hvað er eiginlega að í þessu kerfi ? ? ? ? ?

Við erum að tala um mann með gerfifót (sem hann nota bene má ekki nota í bili) og í hjólastól. Æ það er gott það er ekki langt að fara.

Stressið tekur völdin

Nú er farið að styttast í frumsýningu og stressið alveg um það bil að taka völdin. Merkilegt hvernig það getur farið með mann. Vakna kannsi á morgnana allt of snemma heltekinn af þeirri hugsun að ég verði að gera hitt eða þetta helst strax.

Já handtökin við uppfærslu á leikriti eru milljón allavega, sem betur fer höfum við margar fúsar hendur sem vinna saman að sameiginlegu markmiði. Og gengur bara þokkalega vel þó manni finnist allt vera á deadlina sumar stundir þá held ég þetta smelli nú allt saman og galdurinn verður til sem gerir hverja leiksýninga að töfrastund.

Já ég elska leiklistarstúss þó síðasta vikan sé strembin þá skilar það sér vonandi eftir frumsýningu.

Reyndi að kúpla mig aðeins út í dag. Fór á aðalfund hins merka ferðafélags Víðsýnar. Þar var ég náttúrulega göbbuð inn í stjórn með hraði og rússneskri kosningu. Þetta merkilega félag er að springa heldur betur út. Hvorki meira né minna en 3 utanlandsferðir síðasta starfsár auk styttri ferða innanlands. Hvern hefði grunað það þegar við stofnuðum þennan anga 1999 hæðstu hugsjónir voru kannski 3 nátta innanlandsferðir einu sinni á ári.

Mörg spennandi verkefni eru fyrirliggjandi þetta árið eins og ferð í júní til Hafnar í Hornafyrði og í Ágúst á norrænt geðhjálparmót í Danmörk. Vonandi get ég lagt eitthvað af mörkum við undirbúning þess.

Hitti svo Guðmund besta mág í heimi á kaffihúsinu okkar þar sem við áttum notarlega stund saman. Hann er nú á leið út aftur til Villa bróðir :-(

Vá orðin svaka fræg

Jess aldeilis dagur mar. Haldiði að Silvía Nótt sú eina og sanna hafi ekki bara bankað uppá hjá mér í morgun og boðið mér að koma með sér til Aþenu sem förðunardama. Vá held varla vatni yfir þessu.

Við eyddum deginum í að prufa okkur áfram með make up og það verður sko flott nú skal sko heimurinn rokka feitt þegar þessi útgáfa sést.

Hommi og Nammi komu líka en ég nennti ekkert að mála þá og lífvarðasvínin lét þá bara dúsa fram á gangi hleypi sko ekki hverjum sem er inn til mín. Enda var Silvía Nótt líka orðin þreytt á þessum beljökum og leyfði mér að keyra sig á Kiunni minni í hin ýmsu partý þegar leið á daginn og limman bara elti helvítis dónarnir.

Ég tók fullt af myndum en út af þið vitið samningunum í Eurovision má ég víst ekki birta þær en USS set eina hér þið segið ekki frá........

Fríið á enda

Þá er vikufríinu að ljúka, get nú ekki sagt að ég hafi notað tímann vel. En þó kúplað mig út úr leikritinu milli þess sem maður hefur verið að spá í eitt og annað sambandi við leikritið og svara hinum ýmsu fyrirspurnum.

Í dag er ég svo kölluð á stjórnarfund með stjórn Halans. Ætli það eigi ekki bara að reka mann, hvað veit ég.

Eyddi gærdeginum í að fara milli leikfangabúða og leita að lögguhúfum án árangurs. Hvað er þetta er ekki lengur í tísku að vera í löggu og bófa......
ábendingar um hvar flott kaskeiti fást eru vel þegnar.

Í dag er hálfur mánuður í fyrirhugaða frumsýningu á Pókók og sennilega verður maður á haus niðri í Hala mest allan þann tíma svo kæru vinir og fjölskylda þið verðið bara að sína mér aðeins meiri þolinmæði þennan tíma en þetta tekur fljótt af.

Nú svo er allt á fullu í heimasíðugerðinni. Er að rembast við að halda úti www.halaleikhopurinn.is og næstu daga mun þar koma í ljós síða um Pókók.

Til hamingju með afmælið Olla

Vá ég var næstum búin að gleyma að Olla mágkona á afmæli í dag. Þar sem hún var búin að tilkynna okkur til mikilla vonbrigða að hún tæki ekki á móti gestum var þessi hugsun komin á hold. Hún sem bakar svo góðar kökur og galdrar fram brauðrétti af tærri lyst.



Til hamingju með daginn Olla mín

Áhugaverður dagur

Í dag gerðist ég lifandi bók á bókasafni Húsaskóla. Þetta var mjög skemmtilegt við mættum þarna 8 "bækur" Muslimi, Svartur maður, Hommi, Lesbía, Femíninsti, Alkohólisti, Eineltisbók og eg sem Þunglyndisbók.

Þetta voru krakkar í 8 bekk, þeim var skipt niður í 4 manna hópa og máttu hver hópur taka sér eina bók í 1/2 tíma og fletta upp í honum um viðkomandi málefni. Ég var lánuð út þrisvar og fékk fullt af skemmtilegum og áhugaverðum spurningum. Þessir krakkar voru til mikillar fyrirmyndar prúð og skipulögð og lögðu sig af alúð eftir verkefninu. Ýmsar skondnar spurningar komu fram en mér fannst nú best ein spurningin sem datt út úr einum nemandanum "Er ekki dýrt að vera þunglyndur" :-)

Í kvöld fórum við hjónakornin á heitasta staðinn í bænum Krúa Thai með Palla bróðir og Guðmundi mág. Tókum upp gamlan og góðan sið.

Á heimleiðinn var svo komið við niðrí Hala það er svo erfitt að slíta sig frá þó maður eigi að heita í viku fríi. Þar voru 7 Halar á fullu í málningarvinnu og skemmtu sér stórkostlega. Frábært að sjá dugnaðinn í þeim. Og hvernig þetta litla leikhús okkar tekur stórkostlegum breytingum með nokkrum lítrum af málningu og fúsum Halahöndum.

Ég fraus alveg

Eftir alla veðurblíðuna sem ég skrifaði um í síðasta pistli, skall á þvílíkt vetraveður með roki og fimbulkulda að ég helfraus næstum við að ganga hálfa lækjargötuna. Svona er þetta hér á Fróni en nú er spáð auknum hlýindum aftur svo vonandi fer maður að þiðna.

Á morgun ætla ég að taka að mér alveg nýtt hlutverk og gerast bók á lifandi bókasafni í Húsaskóla. Hlakka til þó ég viti nú ekkert hvað ég er búin að koma mér núna.

Var að tala við Villa bróðir í Afríkunni hann var hress en þreyttur og saknar Guðmundar mikið. En fylgist vel með hvað er að gerast í Halanum og biður kærlega að heilsa öllum sem hann þekkir.

Nú er sem sagt komið á vikufrí hjá mér í Halanum eða svona næstum allavega þarf ekki að mæta daglega eins og ég hef nánast gert frá áramótum hvern einasta dag eitthvað. Ekki það að mér leiðist það væri þá ekki að standa í þessu. Skemmti mér konunglega. Og bíð spennt eftir næstu æfingu.

Vorið er komið

Já það held ég bara rjómablíða dag eftir dag, allavega meðan sólin skín. Grasið í Fossvogsdalnum er iðagrænt og ekki laust við að það þurfi að fara að taka sláttuvélina fram við sum hús.

Já við erum búin að draga Vikoríu aftur fram og skundum nú í göngutúra flesta daga og njótum veðurblíðunnar á Fróni.

Hekla var hjá okkur í 2 daga og yljaði okkur hressilega um hjartaræturnar. Þessi þjarkur var að fá einkunnirnar sínar og við erum að rifna af stolti yfir prinsessunni.


stærðfræði 9
lestur 7,5 (af 8 mögulegum)
skrift 7
málfræði 9
stafsetning 7
Getur það nokkuð betra orðið. Hún hefur verið að hlýða afa sínum yfir textann í Pókók og finnst hann nú ekki nógu góður í þessu. Fékk að koma á eina kvöldæfingu þar sem það var frí í skólanum og skemmti sér vel.


Besti mágur í heimi er svo á landinu og við höfum verið dugleg að hittast og njóta samverunnar. Annars er maður með hugann allan við leikritið. Æfingar ganga vel en það koma alltaf ákveðnir hnútar eins og eðlilegt er á þessum tíma í ferlinu.

Framundan er viku frí frá æfingum en þá á að taka heldur betur til hendinni í leikmynd, leikmunum, búningum og öllu öðru sem tilheyrir.

Enn vantar okkur ýmislegt propps og set ég listann inn hér í þeirri von að einhver góðhjartaður lesandi geti ljáð okkur einhverja muni. Listinn er svo uppfærður reglulega á heimasíðu Halaleikhópsins


Alls konar lopa/ ullar / í sauðalitunum/ dót, má gjarnan vera slitið td. :
Húfur, treflar, sokkar (stroffið er nóg), vettlingar, sjöl, peysur.
3 möppur helst renndar, tvær eiga að vera eins
Vasaklútur stórköflóttur (Ekki þessir gömlu góðu tóbaksklútar)
Fínn herraklútur
Herra hattur
Seðlaveski, gömul kort allskonar dót fyrir óprúttna þjófa
Stór hallærisleg gleraugu á saklausa sveitastelpu.
Fullt af tómum glærum vínflöskum
Skýluklútur/skotthúfa
Flöskustútur með sjússateljara
Blár og grænn matarlitur
Tappatöng (til að setja tappa á gos/bjórflöskur) og tappa
Skrifborðsstóll (forstjóra) svartur með leðuráklæði
Gerviblóm í 1/2 blómavasa
Stóra bangsa
Löggukylfu eða eitthvað í þá áttina
Fjaðratreflar
Vasaúr
Svarta dulu
Úr
Nokkur stk. Sælgætisöskjur
Hálsól
Hundaól útdraganleg
Dropaglös
Plöntur helst ætar
Graslauksplöntur
Svarta minnisbók
Langt munnstykki
Málmlituð ruslafata
Hvít kerti venjuleg
Gamla ölkassa

depurð :-(

Ég er pínulítið mikið döpur. Var að skilja við bestu vini mína til margra ára. Vini sem hafa farið með mér út um allt, í ótal utanlandsferðir og ferðalög upp um fjöll og firnindi og nokkrum sinnum kringum Ísland.

Verið með mér á hinum og þessum skemmtunum, að ótöldum öllum fundunum og ráðstefnunum sem þeir hafa fylgt á.

Þeir hafa tekið þátt í nokkrum leiktímabilum með mér og verið mér sannir félagar sem hafa aldrei brugðist.

Þeir hafa líka verið mjög duglegir við að mæta í öll fjölskylduboð, ótal grillveislur og komu oft með mér í Krikann minn kæra.

Nú finnst mér eins og það sé stórt gat í hjarta mínu og tóm sem vanduppfyllt verður. Enda hef ég lengi leitað að staðgengli fyrir þessa vini mína en það er ekkert sem hefur getað komið í þeirra stað.

Svo nú er ég döpur og leið og full að söknuði.

Lovísa Lilja á afmæli í dag

Lovísa Lilja dóttir Villa bróðir á afmæli í dag. Skellti inn mynd af henni og fallegasta dreng í heimi, syni hennar Gabríel Temitayo. Þau eru að fara eftir nokkra daga til Villa í Greyton S-Afríku

Til hamingju með daginn Lovísa mín

já já

já já er á lífi og í fullu fjöri.

En bara haldin mikilli bloggleti þessa dagana.

Brjálað að gera í leiklistinni og alls kyns nefndarstörfum.

Hafið bara þolinmæði með mér.

Ljóð

Innri átök

Langar að öskra.
Sálin er tómarúm.
Eins og tómur magi,
sem gaular af skorti.
Öskrar sálin af sársauka,
en ekkert heyrist út á við.
Einungis í höfðinu.
Þar sem skerandi veinin óma,
enginn mun nokkurn tíman vita.
Að mig langar að öskra.

Lífsblóm

101 dag eftir dag

Elsku besti mágur í heimi er kominn heim. Mikið er nú dásamlegt að fá að dúlla sér með honum í 101. Síðustu daga hef ég drukkið kaffi á fleiri stöðum en síðasta hálfa árið. Það var svo gott að fá knús frá honum og þessa yndislegu nærveru sem hann einn getur veitt.

Já ég sagði heimsins besti mágur. Hann segist aftur á móti hafa komið til Íslands vegna þess að Frosti var farinn að skora ansi hátt eftir jóla og áramótamatinn. Segist ekki hafa þolað hvað ég var farin að blogga jákvætt um hann. Greyið Steen hefur enga séns í þá íslensku mága mína.

Svo segist Guðmundur ekkert hafa fengið hjartaáfall þetta hafi bara allt hafa verið drama í dramadrottningunni til að komast heim til að keppa við Frosta. Jæja allavega er hann kominn í íslenska heilbrigðiskerfið mér til mikillar ánægju.

Svo verður það spennandi hvað Frosti og Palli kokka ofan í okkur til að heilla okkur upp úr skónum á sunnudaginn en þá verður stórfjölskyldu matarboð. Síðasti sjéns áður en Abrahem fer til UK og svo fer Lovísa og Gabríel seinna í mánuðinum til Villa í Greyton.

Já merkilegt hvað þessi fjölskylda öll er á faraldsfæti og vill búa hér og þar á hnettinum. Ég sem vil bara vera hér á okkar yndislega Fróni, verð þó að viðurkenna að ég er orðin þreytt á rigningunni í vetur.

Syndajátning

Er kanínan ekkert orðin þreytt á að hlaupa spyr anomynus.

Æ ég veit það nú ekki hún bara er svona rétt eins og ég á stundum. Er annars afslöppuð þessa dagana og með allan hugann við P Ó K Ó K sem er svakalega ávanabindandi. Ég kom með poka af þessu æðislega sælgæti á æfingu á nammidaginn og um leið og ég kem á æfingar núna er spurt hvort ég sé ekki með P Ó K Ó K í bakpokanum. Þetta er ferlegt og verksmiðjan ekki kominn í fullan gang enn. Þrátt fyrir að Emanúel hafi nú sett upp ansi mörg tannhjól í fínu vélina okkar í kvöld.

Já og það er nú fleira en P Ó K Ó K sem er orðin ávanabindandi!!! ÉG GERI HÉR MEÐ JÁTNINGU. Ég er orðin háð gálganum. Hlakka til að fara í sjúkraþjálfun og fá að vita hvort ég fæ að fara í gálgann eða ekki. Stórmerkilegur andskoti. Fyrir þá sem ekki vita hvað gálginn er þá er það strekkingarbekkur. Ekki til að slétta úr hrukkunum (enda fylli ég bara út í þær með spiki:)

Nei nei. Það eru settar ólar á höfuðið á mér svona eins og í verstu hryllingmyndum, svo eru þær hengdar upp í gálga með járnstöng. Apparatið er svo með mótor sem togar höfuðuð á mér upp með einhverjum fyrirframstilltum þunga í ákv. margar mínútur svo er slakað aðeins á og svo togað aftur. 15 - 20 mínútur frekar óþægilegt sérstaklega fyrir mína sködduðu kjálkaliði. En árangurinn af þessu togi öllu saman er svo mikill að þetta er orðin tóm sæla. Helmingi færri hausverkir og höfuðið getur nú snúist í báðar áttir flesta daga án teljandi sársauka.

Eins og ég fékk nú mikið kvíðakast þegar ég sá nýja tækið hans Gústa míns fyrst. Og fyrst ég er nú farin að tala um tækin hans þá er hann nú líka kominn með splunkunýtt starwarsleysersverð sem líka virkar helv... vel á olbogann á mér ásamt undrakreminu frá henni Stínu minni. Sem sagt heilsufarið er með betra móti þökk sé öllum hjálparmeðulunum.

Annars gengur lífið sinn vanagang hér á Sléttó og ekkert sérstakt títt úr þeim herbúðum. Við erum meira og minna öll kvöld og allar helga niðrí Hala að æfa upp P Ó K Ó K eftir Jökul Jakobsson. Mikil vinna og mikið gaman. Svo er maður að smá bæta inn á heimasíðu Halaleikhópsins og nú bíða mín stór bunki af gömlum myndum sem ég þarf að fara að skanna inn og setja upp.

Á morgun er svo stóri dagurinn. Guðmundur minn kæri mágur kemur til Íslands mikið hlakka ég til. Búin að sakna hans og Villa míns svo svo svo mikið. Knús til þín Villi minn. Nú fæ ég loksins fréttirnar beint í æð. Það er svo erfitt að tala og skrifa milli heimsálfa í allan þennan tíma.

Æ er hún ekki skemmtileg

Mér fannst´hún svo góð þessi og minna mig yndislega á lætin í mér síðustu mánuði. En nú er ég orðin voða stillt sef frameftir meira að segja